ప్రాణం పోయాల్సిన అంబులెన్స్- ఇద్దరు ప్రాణాలను తీసింది

మార్కాపురం శిఖర జనసాక్షి  : అత్యవసర సమయంలో ప్రాణాలను కాపాడేందుకు ఉపయోగించే అంబులెన్స్‌ ప్రమాదానికి కారణమైంది. అంబులెన్స్‌ బైకును ఢీకొనడంతో బైక్‌పై ప్రయాణిస్తున్న ఇద్దరు మృతి చెందారు. ఈ సంఘటన గొల్లపల్లి వద్ద బ్రిడ్జి సమీపంలో  జరిగింది.మార్కాపురం జిల్లా త్రిపురాంతకం  మండలం సోమేపల్లి  గ్రామానికి చెందిన పల్లెపోగు ప్రసాద్, నార్నెపాటి కోటేష్ పనిమీద బైక్‌పై మార్కాపురం వైపు వెళ్తుండగా, వెనుక నుంచి వచ్చిన సున్ని పెంటకు చెందిన అంబులెన్స్ ఢీకొట్టింది. ఈ ప్రమాదంలో బైక్‌పై ఉన్న ఇద్దరూ తీవ్రంగా గాయపడి అక్కడికక్కడే మృతి చెందినట్లు బాధిత బంధువులు తెలిపారు . ప్రమాదం అనంతరం అంబులెన్స్‌ను అక్కడే వదిలి డ్రైవర్ పరారైనట్లు స్థానికులు తెలిపారు. విషయం తెలుసుకున్న పోలీసులు ఘటనా స్థలానికి చేరుకుని వివరాలు సేకరిస్తున్నారు. ఇద్దరి మృతితో సోమేపల్లి గ్రామంలో విషాదఛాయలు అలుముకున్నాయి. మృతుల కుటుంబ సభ్యులు, బంధువులు కన్నీరుమున్నీరుగా విలపిస్తున్నారు.